TFF NAYO YADHIBITISHA TIMU YA CHAD KUJIENGUA MICHUANO YA AFCON 2017

Shirikisho la Soka nchini TFF
limethibitisha taarifa yetu ya awali
kwamba timu ya Taifa ya Chad ' Les Sao ' imejiondoa katika michuano ya kuwania kufuzu kwa Fainali za Mataifa Afrika ( AFCON ) itakayofanyika mwaka 2017 nchini Gabon .

Tovuti ya TFF inasema kwamba taarifa ya kujitoa kwa Chad imetolewa na Shirikisho la Mpira wa miguu barani Afrika ( CAF) leo baada ya Les Sao kuandika barua ya kujitoka katika mashindano hayo ikiwa katika kundi G pamoja na timu za Tanzania , Nigeria na Misri.

Chad ilitarajiwa kucheza kesho Jumatatu dhidi ya Tanzania katika uwanja wa Taifa jijini Dar es salaam , ikiwa ni mchezo wa marudiano wa kundi G baada ya kucheza mchezo wa awali jijini N' Djamena katika ya wiki.

Katika mchezo wa awali uliochezwa uwanja wa Idriss Mahamat Ouya , Taifa Stars iliibuka na ushindi wa bao 1 - 0 , bao lililofungwa na nahodha Mbwana Samatta dakika ya 30 ya mchezo .

Kufuatia kujitoa kwa Chad, matokeo ya michezo yote iliyoihusisha timu hiyo yanafutwa , na msimamo wa kundi G kwa sasa unaongozwa na Misri yenye pointi 4 , Nigeria pointi 2 na Tanzania pointi 1 .